गौर, रौतहट- गौर नगरपालिकामा स्थानीयस्तरमा विपद् जोखिम न्यूनीकरण तथा व्यवस्थापनलाई थप प्रभावकारी बनाउने उद्देश्यका साथ एक विशेष प्रशिक्षण कार्यक्रम सम्पन्न भएको छ।
गौर नगरपालिकाका नगर प्रमुख शम्भु साहको प्रमुख आतिथ्यतामा आयोजित उक्त कार्यक्रममा वडा नं. १ देखि ९ सम्मका गरी जम्मा ४५ जना सहभागीहरूलाई विपद् व्यवस्थापनसम्बन्धी व्यावहारिक तथा सैद्धान्तिक प्रशिक्षण प्रदान गरिएको हो।
कार्यक्रममा गौर नगरपालिकाका शिक्षा शाखा संयोजक/प्रमुख सुजन पौडेल, विपद् व्यवस्थापन शाखा प्रमुख रोशनी कुमारी श्रेष्ठ तथा सशस्त्र प्रहरी बल (सशस्त्र गुल्म गौर) का डीएसपी दुर्गा भट्टलगायतका अतिथि एवं विषयविज्ञहरूले प्रशिक्षण दिनुभएको थियो।
सो अवसरमा बोल्दै नगर प्रमुख शम्भु साहले विपद् जुनसुकै समयमा पनि आउन सक्ने भएकाले पूर्वतयारी र समुदायस्तरको सचेतनाले सम्भावित क्षतिलाई निकै घटाउन सकिने बताउनुभयो। त्यसैगरी, सशस्त्र प्रहरीका डीएसपी दुर्गा भट्ट र विपद् व्यवस्थापन शाखा प्रमुख रोशनी श्रेष्ठले विपद्को समयमा गरिने उद्धार, राहत वितरण तथा खोज कार्यमा स्थानीय तह र सुरक्षा निकायको समन्वयको महत्त्वमाथि प्रकाश पार्नुभएको थियो।
वडा नं. १ देखि ९ सम्मका सहभागीहरूले तालिमबाट प्राप्त ज्ञान र सीपलाई आफ्नो समुदायस्तरमा विपद् जोखिम न्यूनीकरणका लागि सदुपयोग गर्ने प्रतिबद्धता जनाएका छन।
भिडियो हेर्नुहोस्
