दिल्लीमा प्रदर्शनका लागि जन्तर मन्तरको विकल्पमा तीन स्थान तोकियो

नयाँदिल्ली , असोज २७ –

भारतको राजधानी नयाँदिल्लीमा विरोध प्रदर्शनका लागि प्रयोग हुँदै आएको जन्तर मन्तरको सट्टा प्रहरीले तीनवटा वैकल्पिक स्थान तोकेको छ।

भारतीय सञ्चारमाध्यमका अनुसार अब प्रदर्शनकारीले रामलीला मैदान, बुराडी मैदान र पूर्वी दिल्लीस्थित सीबीडी मैदानमा विरोध प्रदर्शन गर्न सक्नेछन्।

मतदाता नामावली तथा निर्वाचन व्यवस्थापनमा अनियमितता भएको आरोप लगाउँदै प्रमुख निर्वाचन आयुक्त ज्ञानेश कुमारको राजीनामा मागसहित प्रदर्शन भइरहेका बेला प्रहरीले वैकल्पिक स्थान तोकेको हो।

भारतीय संसद् भवन तथा प्रमुख सङ्घीय सरकारी कार्यालय नजिक रहेको जन्तर मन्तर लामो समयदेखि राजनीतिक र सामाजिक मुद्दामा विरोध जनाउने प्रमुख स्थलका रूपमा परिचित थियो। विभिन्न राजनीतिक दल, सामाजिक सङ्गठन तथा नागरिक समूहले आफ्ना माग राख्न यस स्थानमा प्रदर्शन गर्दै आएका थिए।

जन्तर मन्तरको सट्टा अन्य स्थान तोकिएसँगै राजधानीमा विरोध प्रदर्शन व्यवस्थापनको अभ्यासमा परिवर्तन हुने देखिएको छ। यद्यपि, प्रहरीले यो व्यवस्था कहिलेदेखि लागू गरेको हो र जन्तर मन्तरमा प्रदर्शनसम्बन्धी प्रतिबन्धको विस्तृत अवस्था के छ भन्नेबारे उपलब्ध विवरणमा स्पष्ट उल्लेख छैन।