वीरगंजको गहवामाई मन्दिरमा फूलपाती भित्र्याइयो, आज कालरात्रिको पूजा

वीरगंज , असोज ३१ –

बडादसैँको सातौँ दिन फूलपातीका अवसरमा वीरगंजस्थित गहवामाई मन्दिरमा आज विधिपूर्वक फूलपाती भित्र्याइएको छ। फूलपाती भित्र्याएसँगै घरघरमा नवदुर्गाको पूजा–आराधना गर्ने र दसैँ मनाउने क्रम जारी छ।

नेपाली हिन्दू परम्परामा फूलपातीलाई शक्ति, समृद्धि र शुभताको प्रतीकका रूपमा लिइन्छ। यसमा केरा, बेसार, जयन्ती, बेल, अनार, अशोक, माने–कर्कलो र धानलगायत नौ प्रकारका वनस्पति तथा पत्र समावेश गर्ने चलन छ।

नेपाल पञ्चाङ्ग निर्णायक विकास समितिले यस वर्ष बिहान ७ बजेर ३७ मिनेटमा फूलपाती भित्र्याउने शुभ साइत निर्धारण गरेको थियो। परम्पराअनुसार गोरखाबाट ल्याइएको फूलपाती काठमाडौँस्थित हनुमानढोका दरबारको दसैँघरमा विशेष विधिका साथ भित्र्याउने गरिन्छ।

आज कालरात्रि देवीको आराधना

नवरात्रको सातौँ दिन नवदुर्गाको सातौँ स्वरूप देवी कालरात्रिको पूजा गरिन्छ। धार्मिक मान्यताअनुसार कालरात्रिले भय, अन्धकार र नकारात्मक शक्तिमाथि विजय दिलाउने विश्वास गरिन्छ। उग्र स्वरूपकी देवीका रूपमा वर्णन गरिए पनि कालरात्रिलाई भक्तजनलाई शुभ फल प्रदान गर्ने देवीका रूपमा पूज्ने परम्परा छ।

यस दिन देवीलाई सख्खर चढाउने चलन छ। साथै, देवी सरस्वतीको पनि आराधना गरिन्छ। सप्तमीका अवसरमा नवपत्रिकाको पूजा, दुर्गा स्तुति तथा मन्त्र पाठ गर्ने धार्मिक परम्परा रहेको छ।

कालरात्रिको पूजाका क्रममा पाठ गरिने प्रमुख मन्त्र यस्तो छ :

ॐ जयन्ती मङ्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोऽस्तु ते॥

फूलपाती र सप्तमी पूजाले दसैँको धार्मिक तथा सांस्कृतिक महत्त्वलाई थप उजागर गर्छन्। नेपाली समाजमा फूलपातीलाई प्रकृति, शक्ति, समृद्धि र पारिवारिक एकताको प्रतीकका रूपमा मनाउने गरिन्छ।